पुणे : ‘देणे समाजाचे’ हा उपक्रम चालवणाऱ्या वीणा गोखले आणि भगिनी निवेदिता बँकेच्या संस्थापक अध्यक्षा मीनाक्षी दाढे यांना उद्या, २६ मार्च रोजी स्नेहाधार गौरव पुरस्काराने गौरवण्यात येणार आहे. पीडित व अत्याचारित महिलांना दिलासा देण्याचे काम करणाऱ्या स्नेहालय संस्थेच्या स्नेहाधार या पुण्यातील प्रकल्पाच्या वर्षपूर्तीनिमित्त हे पुरस्कार देण्यात येणार आहेत. उद्या, २६ मार्च रोजी पुण्यातील ज्योत्स्ना भोळे सभागृहात सायंकाळी साडेपाच वाजता हा कार्यक्रम होणार आहे.
स्नेहाधार ही संस्था वंचित, पीडित, अत्याचारित, संकटग्रस्त, निराधार महिलांसाठी काम करते. संकटात सापडलेल्या महिलांना आधार आणि आश्रय देण्याचे काम संस्थेमार्फत केले जाते. पुण्यामधील आंबेगाव येथे गेल्या वर्षी ‘स्नेहाधार’चे केंद्र सुरू करण्यात आले. कोणतीही सरकारी मदत न घेता केवळ समाजातील दानशूर लोकांनी केलेल्या मदतीवर ही संस्था चालू आहे. ‘स्नेहाधार’ला पुणेकरांकडून आर्थिक आणि वेगवेगळ्या वस्तूंच्या रूपात मदत मिळत आली आहे. त्याचप्रमाणे इतर गरजू, संकटग्रस्त महिलांपर्यंत पोहोचण्याचे काम संस्थेतर्फे सातत्याने चालू असते. या सगळ्याविषयी कृतज्ञता म्हणून या गौरव समारंभाचे आयोजन करण्यात आले आहे.
डॉ. शां. ब. मुजुमदार यांच्या हस्ते पुरस्कार प्रदान करण्यात येणार असून, कार्यक्रमाला ‘स्नेहालय’चे संस्थापक गिरीश कुलकर्णी उपस्थित राहणार आहेत.
